Sa ikalawang magkasunod na taon, bababa ang taunang pagtaas ng singil sa upa na nakapantay sa inflation

(Pexels Photo)

VICTORIA – Mas maraming indibidwal ang maaaring manatili sa abot-kayang tirahan malapit sa kanilang trabaho, paaralan, at mahal sa buhay. Ito ay dahil ipinapantay ng Province ang pinapahintulutang taunang pagtaas ng upa sa inflation na 2.3% para sa 2026, mas mababa kumpara sa 3% noong 2025.

“Ang B.C. ay isang nakabibighaning lugar, ngunit dahil sa kawalan ng katiyakan sa ekonomiya at mga tumataas na presyo ng bilihin, nahihirapan ang publiko na makahanap ng matitirhan na pasok sa kanilang budget,” sabi ni Christine Boyle, Minister of Housing and Municipal Affairs.

“Patuloy kaming naglalagay ng limitasyon sa pagtaas ng upa at ipinapantay ito sa inflation. Ginagawa namin ito upang mabawasan ang gastos sa pabahay para sa seniors, mga pamilya, at mga indibidwal—para maprotektahan sila laban sa hindi makatarungang pagtaas ng renta. Kasabay nito, pinapahintulutan rin ng mga limitasyong ito ang mga landlord na makapag-invest sa kanilang mga ari-arian at mapanatili ang mga pinapaupahang tirahan sa merkado.”

Konsistent sa Consumer Price Index

Ito ang ikalawang magkasunod na taon na ang maximum na pagtaas ng upa ay nakapantay sa Consumer Price Index (CPI).

• 2024: Nilimitahan sa 3.5% ang pagtaas ng upa, mas mababa sa 5.6% inflation.

• Bago ang 2018: Pinapayagan ang dagdag na 2% bukod pa sa inflation rate, na nagdagdag ng daan-daang dolyar sa gastusin ng mga karaniwang pamilya sa B.C.

Petsa ng Implementasyon

Ang maximum na pinapahintulutang taunang pagtaas ng upa para sa 2026 ay hindi maaaring simulan bago Enero 1, 2026.

Dahil maaga itong inianunsiyo, magkakaroon ng sapat na panahon ang mga landlord upang maisagawa ang kinakailangang tatlong buwang abiso para sa mga nangungupahan.

Mga Suporta sa Umuupa

Mula 2017, pinalalakas ng Province ang suporta para sa mga umuupa habang tinitiyak rin na may aksiyon laban sa problematikong pangungupahan.

• Naibsan ang mga ilegal na renoviction (pagpapaalis ng tenant para mag-renovate).

• Nagbibigay ng $400 renter’s tax credit taun-taon para sa mga umuupa na may mababa at katamtamang kita.

• Naging unang province sa Canada na nagpatupad ng rent bank services, na nagbibigay ng interest-free loans para sa mga biglaang pinansiyal na pangangailangan.

• Pinalakas ang Rental Protection Fund, Rental Assistance Program, at Shelter Aid for Elderly Renters program para sa mga pamilyang mababa ang kita at seniors.

Residential Tenancy Branch Reforms

Parehong nakikinabang ang umuupa at landlord sa mga reporma:

• Mas mabilis ang resolusyon ng disputes—mula tatlong buwan tungo sa isang buwan.

• Mas malinaw na guidelines sa paghawak ng inabandonang gamit ng tenant.

• Dagdag na gabay para sa parehong landlord at umuupa sa proseso ng mga hearing.

Mahalagang Impormasyon

• Ang annual rent increase ay batay sa 12-month average percent change sa all-items CPI ng B.C., na nagtatapos sa Hulyo ng nakaraang taon.

• Para sa manufactured-home parks, ang 2026 increase ay 2.3% din, dagdag ang buwis at utility adjustments.

• Hindi sakop ang pagtaas para sa commercial rentals, non-profit housing (income-based), co-operative housing, at ilang assisted-living facilities.

• Dapat magbigay ang landlord ng tatlong buwang abiso gamit ang wastong form, at maaaring magtaas ng renta isang beses lang kada 12 buwan.

🔗 Karagdagang Impormasyon:

• Annual allowable rent increase: gov.bc.ca

• Homes for People action plan: news.gov.bc.ca

• Housing initiatives: strongerbc.gov.bc.ca/housing

• Tenant and landlord rights: gov.bc.ca