Canada News
Mga pahayag ng premier at minister para sa Labour Day
VICTORIA – Naglabas ng pahayag si Premier David Eby para sa pagmamarka ng Labour Day:
“Ang mga manggagawa ang puwersa ng tagumpay ng ating province: ang mga nagtatrabaho sa mga palayan, mga flight attendant, mga retail worker, mga clerk, mga tagalinis, mga trucker, mga aide ng mga guro, mga first responder at marami pang iba. Dito sa British Columbia, ang mga tao ang ekonomiya.
“Ngayong araw, ipinagdiriwang natin ang hindi matatawarang kontribusyon ng mga manggagawa at ng kilusang manggagawa. Ang Labour Day o Araw ng Paggawa ay isang oportunidad upang gunitain at bigyang-pugay ang mga bagay na ipinaglaban – at ipinanalo – ng pagkilos ng mga manggagawa – kung saan marami sa mga ito ay mga karapatang kasalukuyan nating tinatamasa. Kabilang dito ang maternity at paternal leave, overtime pay at mga pamantayan sa kaligtasan sa mga lugar ng trabaho.
“Dedikado ang ating pamahalaan na gawing mas maginhawa ang pamumuhay ng mga manggagawa sa province na ito. Nitong nakaraang taon, itinaas natin ang minimum wage sa $17.85 kada oras, ang pinakamataas sa lahat ng province sa Canada. Noong Abril, nagsagawa tayo ng mga pagbabago sa Employment Standards Act na magtatanggal ng pangangailangan ng mga manggagawa na magbigay ng mga sick note para sa panandaliang pagliban sa trabaho.
“Dumadagdag ito sa ating mga kolektibong tagumpay, kabilang ang pagbibigay proteksiyon sa mga manggagawa sa pamamagitan ng paid sick leave, pagbalik sa pampublikong sistema ng libo-libong manggagawa sa mga serbisyong pangkalusugan, at pagbawas sa mga singil sa child care nang kalahati o higit pa para sa maraming nagtatrabahong magulang.
“Kasama bilang partner ang kilusang manggagawa, ipinakilala namin ang hanggang limang araw na paid leave o may bayad na bakasyon kada taon para sa mga manggagawang nakakaranas ng karahasan sa tahanan o pansekswal na karahasan. Naipakilala rin namin ang lehislasyon para sa pay transparency (malinaw at bukas na pagsisiwalat ng halaga ng mga sweldo) upang mabawasan ang gender pay gap (agwat o pagkakaiba ng kita sa pagitan ng iba’t ibang kasarian). Ginawa nating mandatoryo para sa mga employer at mga construction site na may 25 manggagawa o higit pa na maglagay ng mga flush toilet, pasilidad para sa paghuhugas ng kamay at malilinis na banyo. Nakapaghatid rin tayo ng mga pangunahing proteksiyon at mga hakbang para magkaroon ng minimum-wage ang mga app-based ride-hailing at delivery services worker.
“Ang mga demokrasya ay itinataguyod ng lakas ng mga manggagawa. Nagpapasalamat kami sa mga indibidwal na nagtatrabaho sa B.C. sa kanilang dedikasyon upang maging mas maunlad at mas masagana ang ating province para mamuhay at makapagtrabaho ang mga mamamayan.
“Maligayang pagdiriwang ng Labour Day!”
Pahayag ni Jennifer Whiteside, Minister of Labour:
“Ngayong Labour Day, pinagninilayan ko ang hindi matatawarang kontribusyon ng mga manggagawa sa iba’t ibang panig ng ating province. Bilang Minister of Labour, ikinararangal kong tumindig kaisa ang mga manggagawa at tumulong para maprotektahan ang mga pinaghirapan na pag-unlad na matagumpay na nakamit ng mga unyon at ng kilusang manggagawa. Kapag tayo’y nagkakaisa, nagtataguyod tayo ng mga ligtas na lugar ng trabaho at mas matatag na kinabukasan para sa lahat dito sa B.C.”
